Assanami Triste Hare Xanana, Taur, Horta no Alkatiri | Partidu Demokratiku

Assanami Triste Hare Xanana, Taur, Horta no Alkatiri

Assanami Triste Hare Xanana, Taur, Horta no Alkatiri


Prezidente Partido Democratico Mariano Assanami Sabino ho Komitiva Tama ba Fatin Kampanha PD iha Kampo Ladi Munisipiu Covalima | Photo Dok: Partidu Demokratiku

Manufahi (16/04/2018) : Prezidente Pártidu Demokrátiku (PD), sente triste hare lideransa nasional ne’ebe oras ne’e sira la solidu lori istoria hodi hatun malu iha festa demokrasia kampana Eleisaun Antesipada (EA), tinan ne’e.

“Hau sente triste hare lider nasional sira hanesan maun Bo’ot Kay Rala Xanana Gusmão, Mari Alkatiri, Ramos Horta, Taur Matan Ruak, sira tetek malu tan istoria. Hanesan zerasaun foun ita iha responsabilidade bo’ot oinsa reuni fali sira, atu nune’e bele garantia nafatin unidade nasional,” hatete Prezidente PD, Mariano Assanami Sabino iha kampu Futebol Manufahi.

Assanami dehan, Unidade Nasional ne’ebé ohin loron buras ona iha Timor lori tempu naruk hafoin hetan. Tamba ne’e ohin loron tempu to’o ona atu hamutuk hodi tane malu atu nune’e labele fahe malu tan.

“Hanesan jerasaun foun iha obrigasaun moral atu tane lider nasional sira. La’os tan ita nia ambisaun hetan poder, hodi soran lider nasional atu tetak malu iha publiku,” nia dehan.

PD hanesan jerasaun foun prontu no firme ho nia loyalidade ba jerasaun tuan sira atu suku fila-fali diferensa ne’ebé mak ohin loron lider sira iha.

Hanesan jerasaun foun ne’ebé hahoris husi sira ohin loron matenek no koñese ona ukun, tamba ne’e sei buka meius oi-oin hodi halo mediasaun ba jerasaun tuan sira atu hamutuk hodi halo buat ruma ba nasaun ida ne’e.

Diferensia lider nasional sira nian la’os sira la gosta malu atu destroi nasaun ida ne’e. Maibé sira nia diferensia sai hanesan esperensia mai jerasaun sira oinsa atu bele jere diferensia sira ne’e.

Tanba ne’e husu ba jerasaun foun sira ho matenek hodi dezena programa hodi fa’an ba povu atu bele hetan votus atu nune’e ba ukun karik ho responsabilidade tuir konseptu ne’ebé programadu ona.

Pártido Demokrático Official Website