Hametin Paz no Estabilidade ElPar, Joventude PD Assina PUN | Partidu Demokratiku

Hametin Paz no Estabilidade ElPar, Joventude PD Assina PUN

Hametin Paz no Estabilidade ElPar, Joventude PD Assina PUN

Presidente Joventude, Partidu Demokrátiku (PD) Nivio Magalhães assina karta Paktu Unidade Nacional, hodi hametin Paz no Estabilidade iha Elisaun Parlamentar (ElPar) periodu 2017-2022. | Dok Photo : Aquadiovisual-PD

Assina karta PUN ne'e organiza husi governu liu husi Sekretariu Estadu Joventude no Desportu (SEJD), ho joventude Partidu Politiku 21, iha Jardim Estatua Proklamador Francisco Xavier do Amaral, Caicoli, Sabado-Lokraik (18/06).

Hafoin Assina PUN, Presidente Joventude PD, Nivio Magalhães hateten, festa demokrasia ne'ebe sei mosu iha loron 20, fulan Junho besik ona. Maske joventude barak mai husi partidu no kor ketak-ketak. Maibe Timor ida deit. Tanba ne'e presiza hamutuk hodi kontribui ba Paz, Estabilidade no Dezenvolvimentu rai ne'e.

Joventude Partidu Politiku foto hamutuk ho Sekretariu Estate Joventude no Desportu (SEJD), Leovigildo Hornai, hafoin remata assina karta Paktu Unidade Nacional Iha Jardim Estatua Proklamador Francisco Xavier do Amaral, Caicoli, sábado (18/06). (Foto/Aquadio-PD)

"Partidu bele iha diferensia, hanoin bele lahanesan. maibe Timor ne'e ida deit. ita hotu presiza atu kontribui ba paz, estabilidade no dezenvolvimentu rai ida ne'e nian," hatete Presidente Joventude PD,Nivio Magalhães iha Jardim Estatua Proklamador Francisco Xavier do Amaral.

Presidente Joventude ne'e dehan, assina PUN ne'e importante teb-tebes, maibe husi ba joventude Partidu Politiku sira hotu, liu husi assina PUN ne'e tenke iha implementasaun no sosializa ba militantes sira atu nune'e sira bele assegura mos paz no estabilidade iha ElPar tinan ne'e.

Iha fatin hanesan Sekretariu Estadu Joventude no Desportu (SEJD), Leovigildo Hornai hatete,..... aktividade ne'e CNJTL mak organiza hamutuk ho Joventude Partidu Politiku sira, governu apoiu inisiativa ida ne'e.

Nia dehan, ida ne'e importante teb-tebes. Tanba durante ne'e depende ba ema husi rai liur atu implementa, orienta no fo hanoin. Maibe tinan ne'e joventude Partidu Politiku tenke halo rasik ho sira nia kapasidade no sira nia kooperasaun ne'e diak tebes entre partidu politiku sira. (Aquadiovisual-PD). 

Pártido Demokrático Official Website