Koligasaun ho fretilin laos oportunidade maibe responsabilidade | Partidu Demokratiku

Koligasaun ho fretilin laos oportunidade maibe responsabilidade

ASSANAMI : KOLIGASAUN HO FRETILIN LAOS OPORTUNIDADE MAIBE RESPONSABILIDADE


Presidente Partidu Demokratiku Eng. Mariano ASSANAMI Sabino foto hamutuk ho Prezidente da Republika wainhira entrega dokumentus koligasaun ba PR iha Palasiu Prezidente Aitarak laran | Photo Dok: Partidu Demokratiku

Liquisa : Prezidente Partidu Demokratiku (PD), Eng. Mariano ASSANAMI Sabino halao enkontru ho estrutura PD munisipiu liquisa iha sede partidu demokratiku munisipiu liquisa nian hodi informa ba kuadrus sira konaba situasaun politika rai laran (17-12-2017)

Iha oportunidade ne’e Prezidente PD lahaluha agradese ba inan-aman tomak iha munisipiu liquisa, ba kuadros tomak partidu demokratiku nian, agradese mos ba organizasaun massa oi-oin nebe fo apoio ba PD iha ELPAR fulan jullu liu ba.

Prezidente PD ne’e informa katak, ba oin ita lao hamutuk koordenasaun ho partidu Fretilin iha parte programa nian, tamba iha leten ne’e ita halo koligasaun ona, entaun iha klaran, iha kraik ne’e imi tenki iha koordenasaun maibe karik mosu eleisaun antisipada PD sei lao mesak iha ninia ain-leten tamba ita nia karakter PD ne’e diferente ho partidu seluk, laiha komparasaun entre partidu ida ho ita (red-PD) iha situasaun ida ne’e maka ita mos iha responsabilidade boot ba povu no nasaun ida ne’e.

Ita nia hamutuk ho partidu Fretilin ne’e ita firme, ne’e ita la-ragu-ragu mais ne’e la-hamihis ita nia lealidadade maka durante ne’e ba maun boot Xanana, durante ne’e ba maun taur, durante ne’e ba falintil ne’e signifika katak ita nia komunikasaun ho PLP no CNRT lao nafatin. Ita nia firmeja ho koligasaun ne’e laos ragu-ragu tamba laos oportunidade, maibe ne’e responsabilidade.

Se oportunidade ita la ba halo koligasaun, maibe responsabilidade ba rai ida ne’e, ba estadu ida ne’e, ida ne’e maka prinsipiu partidu demokratiku nian, ida ne’e maka klamar partidu demokrátiku nian, entaun ita ba, ita ba ho hanoin ida katak “ BA O TIMOR MAUBERE OAN PRONTU SERVI”. servi iha nebe deit, servi rai ida ne’e, servi povu ida ne’e ho se deit ita sempre prontu. Ita la ejiji kadeira, ita lahusu kadeira, ita lahusu fatin, ita mos la fo ejijensia, ita mos la ameasa dehan ami lahetan ida ne’e ami sai.

Prezidente PD ne’e akresenta tan katak ohin ita deside lao hamutuk ho fretilin, ita labele dehan lae lolos ne’e hau la asseita ida, lae lolos ne’e hanesan ne’e, laiha lolos ida. Iha mensagen husi maun nain rua (Xanana-TMR) mai, hau resposta katak nudar imi nia jerasaun imi konhese ami ho diak, maibe imi nia jerasaun ida ne’e atu defende estadu ida nebe imi foin hahoris ne’e, estadu nebe ke fakar ran i imi mak lidera i gerileiru hira mak mate depois imi moris, estadu ne’e tenki lao tamba ne’e PD ninia konviksaun mak ne’e aposta ba estadu, aposta ba interesse estadu para i depois ita lao ba oin.

Ita laos hamrik iha fretilin nia sorin para ataka ema, ita laos hamrik iha fretilin nia sorin para trata aat ema,ita laos hamrik iha Fretilin nia sorin para tolok ema, maibe tenki kontinua hametin ita nia ligasaun ho partidu seluk. ita dehan ona katak ita manan votus ne’e ho tais (saring) laos ho osan maka ema vota ita, laos ho lobby maka ema vota ita, mais ho tais (saring), ema nebe ke hili ita tamba hare duni ita nia diferensia ho ema seluk, ema nebe hili ita tamba ita kaer duni prinsipiu, ita nia ema lubuk ida to’o iha kraik, imi maubara, bazartete joven sira antigu imi ohin sidauk hetan buat ida, hetan maka ema ataka imi, ema tolok imi, ema tuda imi, tuda imi nia uma, imi nia familia maibe atu dehan kargu ne’e barak mak lahetan, se ita hanoin dehan fahe kargu, kargu sira ne’e mos la to’o tamba ne’e ita sempre aposta ba estadu ne’e katak ita atu uza governu ne’e instrumentu ida para atu servi ba ema tomak, kria kampu servisu ba ema hotu, se ita kria kampu servisu, servisu diak maka ninia benefisiu ne’e ba rai tomak.

Prezidente PD ne’e orienta ba prezidente munisipiu sira, ba estrutura tomak husi prezidente munisipiu to’o koordenador aldeira sira katak, husik ita nia ema hotu-hotu koalia tamba sira kosar, tamba sira maka nain ba partidu, tamba sira esforsu entaun tenki husik hela para sira koalia, sira hakilar, sira hirus, sira mensajen karik simu ho didiak maibe labele husik para sira nafatin ho hirus, labele husik nafatin katak sira diskriminativu, labele husik nafatin katak sira di luar (iha liur) tamba kuandu sira sente-an iha liur ona maka sira sei la esforsu para ema atu aumenta tan votus ba ita tamba ne’e merangkul nafatin, menyakinkan sira, koalia ho sira, ita nia situasaun mak ne’e ita tenki nakloke. (ZAlmeida)

Pártido Demokrático Official Website