Loron Mundial Trabalhador, ​PD Hakruk Ba Trabalhador Timor Oan | Partidu Demokratiku

Loron Mundial Trabalhador, ​PD Hakruk Ba Trabalhador Timor Oan

Loron Mundial Trabalhador
PD Hakruk Ba Trabalhador Timor Oan


Prezidente Pártidu Demokrátiku (PD), hakruk no fo solidariedade ba trabalhador tomak espesial ba Timoroan iha rai laran no rai liur Photo |Dok: Partidu Demokratiku.

Ermera-Atsabe (1/05/2018) : Pártidu Demokrátiku (PD), hakruk no fo solidariedade ba trabalhador tomak espesial ba Timoroan iha rai laran no rai liur, ne’ebé ohin komemora loron Mundial Trabalhador.

Relasiona ho Loron Mundial Trabalhador (01/050, ne’ebé mundu tomak komemora loron imporatante, tanba ne’e PD ho estrutura tomak halo konferesia imprensa hodi fó pensamentu solidariedade no omenajen ba Trabalhador Timoroan tomak ne’ebé mate iha servisu fatin, tanba hakarak atu hatutan moris familia nian.

“Hau orgullu ba Trabalhador Timoroan tomak iha rai laran no rai liur, tanba imi heroiku tebes hodi kontinu obra funu nain sira nian halo servisu hodi hatama osan hadia ekonomi familiar,” hatete Prezidente PD, Mariano Assanami Sabino iha Postu Atsabe-Ermera.

Tanba ne’e PD fo solidariedade no omenajen hodi halo minute ida hakmatek hodi hanoin hikas trabalhador sira ne’ebé hetan dezastre no mate iha momentu sei hala’o hela servisu.

Assanami dehan, iha mundu servisu empregador no trabalhador dependente ba malu, maibé empregador balun ladun fó importansia hodi kria kondisaun ba servisu nain sira.

Tanba ne’e PD hakruk no kompromete ba trabalhador tomak sei hadia kodisaun ida ne’ebé justu atu nune’e sira bele halo servisu ho responsabilidade hodi tula servisu ne’ebé mak fó.

Assanami hatete, ba joven Timoroan sira ne’ebé to’o ona tinan atu bele halo ona servisu PD kompromete sei kria kondisaun hodi fó servisu ba sira atu nune’e bele hadia sira nia moris no garantia sustentabilidade ekonomia familia nian.

Ba Timoroan ne’ebé servisu iha  Autralia, Korea do Sul, Inglaterra, Irlanda PD hakruk no orgullu no konsidera imi sai hanesan eroi familia nian hodi halo ona uma, suporta ona alin sira ba eskola ne’e apresia no orgulhu bo’ot ida ba sira.

Aliende ne’e Assanami mos fo instrusaun ba Sekretariu Estadu Juventude Trabalhu (SEJT), atu kaer metin nafatin Planu Estratejiku Dezenvolvimentu ba Juventude (SEDJ), nian oinsa atu forma skill joven sira nian ne’ebé preparadu atu bele utiliza iha merkadu servisu.

Ba formasaun professional no formasaun ba lingua ingles no lian Koreia nian kontinua la’o hodi forma joven sira atu bele preparadu hodi bele responde nesesidade kampu servisu nina.

Alende ne’e ba joven sira ne’ebé hakarak ba servisu iha Inglaterra no Irlanda ohin loron tenke sai nasionalidade Portugal hafoin bele ba iha ne’eba, tanba ne’e kuandu PD manan iha EA kompromete sei halo koperasaun bilateral hodi labele depende ba Portugal.

Pártido Demokrático Official Website