Nivio : Konstroi Sentru Treinamentu Multi Funsaun Iha Ermera | Partidu Demokratiku

Nivio : Konstroi Sentru Treinamentu Multi Funsaun Iha Ermera

Nivio : Konstroi Sentru Treinamentu Multi Funsaun Iha Ermera


Prezidente Organizasaun Juventude Demokratiku (OJD), Nivio Mangalhães, hato'o nia kompromisiu politiku ba nia militantantes no simpatizantes sira iha kampu Futebol, postu administrativu Gleno, Munisipiu Ermera| Photo Dok: Partidu Demokratiku.

Ermera (29/04/2018) : Pártidu Demokrátiku (PD), kompromete ba povu Ermera tomak katak kuandu hetan Vitoria iha Eleisaun Antesipada (EA), sei konstrui sentru treinamentu multifunsaun hodi akumula jovens sira hodi kapasita nia-an.

Prezidente Organizasaun Juventude Demokratiku (OJD), Nivio Mangalhães hatete, Timor-Leste foin ukun-an joven barak sei dezempregu hela,  tanba ne’e PD hetan vitoria iha EA ida ne’e sei loke sentru treinamentu multi funsaun hodi fó oportunidade ba joven sira atu kapasita nia-an hodi bele kompete iha merkadu trabalhu.

“Ita sei loke setru treinamentu multi funsaun ida iha munisipiu Ermera atu nune’e bele uja hodi forma eskil joven sira nia iha area firmasaun professional nian atu bele prontu hodi utiliza iha kampau servisu,” hatete Prezidente OJD, Nivio Mangalhães iha nia kompromisiu politku PD ba nia militantantes no simpatizantes sira iha kampu Futebol, postu administrativu Gleno, Munisipiu Ermera.

Nivio hatutan, Timor adopta merkadu livre, tanba ne’e ema barak sei tama mai hodi halo servisu iha area Karpintaria, Pedreiru, Mekanika no sira seluk, maibé joven Timoroan rasik la preparadu ne’e defisil atu kompete ho sira entaun ema seluk sei kontinua domina merkadu servisu.

“Tanba ne’e PD hakarak atu lori setru formasaun mai hakbesik iha baze, atu nune’e bele fo treinamentu ba joven sira atu nune’e bele kompete ho ema estranjeiru sira iha merkadu servisu nian,” Nivio dehan.

Iha fatin hanesan tuir Presidente PD Mariano Assanami Sabino hatete, PD lakoi hare joven Timoroan sira dezempregu iha nia rain rasik.

Kuandu PD hetan fiar husi povu hodi ukun nasaun ida ne’e sei oriente Sekretariu estadu juventude trabaillu SEJT atu bele kria kondisaun ba jovens sira hodi bele asesu ba servisu.

“Ita lakoi hare jovens foin sa’e sira sai dezempregu iha ita nia rain” dehan Assanami.

Pártido Demokrático Official Website