Nívio Magalhães : PD Sei Prepara Joventude ho Kualidade | Partidu Demokratiku

Nívio Magalhães : PD Sei Prepara Joventude ho Kualidade

Nívio Magalhães : PD Sei Prepara Joventude ho Kualidade


Prezidente Joventude Demokrátiku (PJD), Nívio Magalhães| Photo Dok: Partidu Demokratiku

Manatuto (27/04/2018) : Wainhira povu fiar no fo votus Pártidu Demokrátiku (PD), iha loron 22 fulan Maio hodi ukun tinan 5, sei prepara joventude sira ho kualidade liu husi formasaun profesional oin-oin atu nune’e joventude sira bele kontribui ba dezenvolvimentu nasional.

Prezidente Joventude Demokrátiku (PJD), Nívio Magalhães hatete, wainhira Pd hetan fiar husi povu iha Eleisaun Antesipada (EA), iha loron 22 fulan Maio hodi ukun, PD sei fo apoiu ba joventude to’o iha area rural, ne’ebe hakarak halo sira nia aktividade hodi dezenvolve sira nia-an.

“Ita mos sei hare formasaun profesional, iha area oin-oin atu nune’e bele prepara didiak ita nia joventude sira, prepara sira atu sai joventude ne’ebe kualidade atu nune’e bele kontribui dezenvolvimentu nasional,” hatete Prezidente Joventude Demokrátiku (PJD), Nívio Magalhães ba militantes no simpatizates sira iha Munisipiu Manatuto. 

Nívio haktuir tan katak, maski oras ne’e dadauk  dezempregu a’as iha Timor-Leste,  tanba ne’e wainhira PD manan sei loke kampu servisu ba joventudade sira hotu to’o iha area rural, tanba joventude mak futuru nasaun nian.

Nia hatutan katak, iha nia mandatu kontinua nafatin, haruka trabalhador Timor oan ba rai liur, tanba programa ida ne’e sira kontribui tebes sira nia familia Timor-Leste. 

“Sira ne’ebe servisu iha rai liur hanesan Korea, Australia no Inglatera sira kontribui tebes ba familia. Ita valoriza sira no orgullu ho sira, ita bele hatete sira nia servisu ne’e importante,” Nívio dehan. 

Wainhira PD kaer ukun, sei kontinua nafatin programa ida ne’e no sei asegura prosesu ne’e ho los no lolos hodi fo oportunidade ba Timor oan hotu to’o iha rural tuir moto slogan PD nia katak, “Hari’i Nasaun Husi Baze.”

“Ita sei hare no tau matan mos ba joventude sira iha area rural liu-liu sira ne’ebe kbi’it laek atu hetan oportunidade ne'ebe hanesan. Ita sei asegura katak programa ida ne’e, tanba important ba Timor oan tomak, PD fo atensaun masimu ba joventude sira hotu,” nia dehan. 

Tuir nia, oras ne;e trabalhador estranjeiru barak mak buka moris Timor, maibe PD manan sei hare. Servisu ne’ebe mak Timor oan sira bele halo, tenke fo oportundiade ba sira atu halo. 

“Ita sei fo oportunidade ba sira atu halo. Atu nune’e Timor oan hotu bele hetan servisu no asegura katak trabalhadores sira hotu tenke hetan tratamentu diak iha servisu fatin. Se mak kontra lei, ita sei la tolera,” Nívio hatete.
   

Pártido Demokrático Official Website