Profile Sekertáriu Jerál PD | Partidu Demokratiku

Profile Sekertáriu Jerál PD

sampleimage_4.jpg

Maubere Oan Husi Bazartete Prontu Atu Serbi

António da Conceição "KALOHAN" nudar maubere oan no jerasaun husi Nicolau Lobato ne'ebé prontu atu sakrifika nia an hodi materializa mehi familia Lobato nian no mehi funu nain sira seluk. Katak nasuan ida ne'e tenki sai nasaun soberanu nudar nasaun ukun rasik an, povu ida ne'e tenki moris ho dignu nudar humano no nudar Timoroan iha nasaun RDTL.

Lia fuan Maubere oan ne'e kesi iha fuan mak "Ba Ó Timor Hau Maubere Oan Prontu atu serbi".

Iha loron 8, fulan Outubru 1964, iha suku Leorema, postu Administrativu Bazartete, munisípiu Liquiça, Maromak haraik kosokoan ba Tobias Manuel Lobato (matebian) no Inan Adelaide Sarmento (Matebian). kosok oan ne'e mak hanaran António da Conceição "KALOHAN".

Bainhira Kalohan nakfilak-an husi kosokoan sai ba Idade joven " KALOHAN " hetan nia fuan sorin, husi rai ne'ebé nia emar sira hetan uluk loron matan nia roman bainhira naroman to'o (Lautem-Lospalos), nia mak Iria de Fátima Neves Camões, oan feto husi Luis de Camões no Rosentina Neves de Camões ,hodi deside hari uma kain

Husi familia ne'ebé delek ba alfabetu, Antonio da Conceição "Kalohan" hakarak sai roman ida ba familia liu husi eskola. Ensino Primariu Colégio Infante de Sagres Maliana, iha tinan 1970-1975 no hasai Kuarta Classe (IV), hafoin revolusaun ne’ebé mós hamosu funu, António da Conceição halai ba ai-laran ho família durante tinan tolu (3) hahú husi tinan 1975 to’o 1978, nia hetan kapturasaun hamutuk ho família iha fulan Juñu 1978 iha suku Leorema no tama iha kampu detensaun iha postu Bazartete hahú husi tinan 1978 to’o tinan 1981.

Bainhira situasaun hakmatek, Kalohan hahu fali nia estudu iha eskola Seminário de Nossa Senhora de Fátima Lahane no frekuenta eskola iha Externato de São José Balide no hasai sétimo ano ho eskola Lian Português, únika eskola ne’ebé sei hanorin ho lian Portugues iha tinan 1982 to’o 1987.

Iha tinan 1987 to’o 1991 nia estuda filosofia no Teologia iha Seminário Maior Malang, Indonesia, no iha tinan 2003 to’o 2005 nia kontinua fali estudu iha “Lancaster University”, Inglaterra no hasa’i Mestradu iha Relações Internacionais e Estudos Estratégicos.

Bainhira kalohan sente bukae ne'ebé nia hetan husi eskola oin-oin husi nasaun seluk, ikus mai Bazartete anan ne'e, deside nia-an hodi envolve an iha vida politika organizasaun Resistensia Nacional dos Estudantes de Timor-Leste (RENETIL) ne’ebé lidera husi Fernando La Sama de Araújo. Nia rasik hala’o responsabilidade nuudar Sekretario Região Malang hodi lidera movimentu estudantes ba prosesu ukun rasik an iha Malang-Indonesia, husi tinan 1987 to’o tinan 1991.

Iha 1991 nia simu mandatu husi RENETIL atu fila mai Timor hodi hamutuk reforsa servisu movimentu klandestina nian iha rai laran, hodi reforsa servisu klandestina direitamente, hahú husi tinan 1991 to’o referendum 1999 wainhira Timor oan hakotu hamriik mesak nuudar Nasaun Independente no Soberanu.


Iha tinan 1991 to’o 1999, KALOHAN hala’o knaar reprejenta RENETIL iha Timor-Leste hodi servisu hamutuk ho funu nain sira hanesan SABALAE, David Dias, Ete Uku no lideransa sira seluk husi reziaun IV ninian.

António da Conceição hamutuk ho ninia kompañeru lubun hahú loke diskusaun hodi hari’i Pártido Democrátiku (PD), hafoin Timor-Leste hetan libertasaun iha tinan 1999. No PD hamriik ofisialmente iha loron 10 juñu 2001.


sampleimage_4.jpg

Foto Dok Partido Democratico : Fundador sira halo deklarasaun Partido Democratico iha Loron 10 Fulan Juñu tinan 2001.


Iha VII Governu konstitusional, Kalohan asume kargu nu'udar Ministro Komersiu no Industria.

Iha VI Governu konstitusional, Kalohan asume kargu nu'udar Ministro Estado Koordenador Assuntos Sociais no Ministro Edukasaun.

Kargu ida ne’e simu liu husi desijaun Prezidente partidu CNRT, Kayrala Xanana Gusmão no aseitasaun Primeiru Ministru ninian no hahú iha loron 10, fulan Agostu, tinan 2015 to’o ohin loron, hodi troka Fernando La Sama de Araújo (matebian) ne’ebé mate iha misaun servisu iha loron 2, fulan Juñu, tinan 2015. Kargu ne'ebé oferese ba nia, tanba haré Antonio líder ida ne'ebé mak ukun ho onestidade no tane ás interes povu nian.


Iha tinan 2012, bainhira forma V Governu konstitusional nia hetan fiar hodi kaer pasta nuudar Ministro Comerçio e Industria, kargu ida ne’e hahú kaer husi fulan Agusto 2012 to’o fulan Agusto tinan 2015.

Iha Governu tranzisaun ne’ebé lidera husi Dotor Sérgio Vieira de Melo (matebian), António da Conceição hetan mós fiar hodi tama iha Governu nuudar asesor ba Ministru Xefi Dotor Mari Alkatiri, hodi servisu iha Comição de plano, hodi dezenvolve Plano Estratégico de Desenvolvimento Nasional dahuluk.

António da Conceição hala’o knaar iha Ministerio da Justiça nuudar Asesor husi tinan 2008 to’o 2010, hafoin remata kontratu, nia nudar asesor iha Ministerio das Financas.

António da Conceição mós nuudar funsionariu Ministerio dos Negocios Estrangeiros ho grau B ativu no agora dau-daun ne’e hola hela lisensa espesial seim vensimentu nuudar funsionariu atu hala’o knaar polítiku nuudar membru Governu iha V no VI Governu Konstitusional.

Nia iha mós experiensia servisu tinan barak ho Organizasaun Naun Governamental (ONG) nasional no internasional hanesan ETADEP,Timor-Aid, BELUN no CARE International no mós servisu iha ajensia Internasional nasaun Canada nian CIDA, nasaun America ninian USAID no nasaun Australia ninia maka AUSAID.

Ninia domina lian materna Mambae no bele koalia no hakerek diak liu iha lian Portugues, Inglês,Tetum no Bahasa Indonesia. (Aquadiovisual-PD).

Pártido Demokrático Official Website